O director da Axencia Galega da Calidade Alimentaria, José Luis Cabarcos dará a benvida ao acto e o conselleiro do Medio Rural, José González, fará o saúdo institucional e a apertura do “túnel de armonías”.
Será un acto de exaltación da excelencia dos viños, augardentes e licores tradicionais de Galicia pero tamén de aprendizaxe da historia do cultivo da vide en Galicia e de demostración das armonías entre os nosos viños, augardentes e licores con outros produtos galegos de calidade diferenciada.
Así, os asistentes serán recibidos cun viño escumoso galego e poderán asistir á masterclass “Domesticación da Vide en Galicia” a cargo de Alejandro Paadín, coautor da “Guía de viños, destilados e bodegas de Galicia” que fará un percorrido pola historia do cultivo do viñedo na nosa terra e as diversas variedades autóctonas que foron conformando a singularidade dos nosos viños.
A continuación, e tralo saúdo do Conselleiro do Medio Rural, abrirase o “túnel de armonías” no que os asistentes terán unhas fichas á súa disposición para facer unha comparación das propiedades organolépticas dos viños, licores e augardentes premiados nas Catas de Galicia, con outros produtos de calidade como son os queixos galegos con DOP, o mel da IXP Mel de Galicia, o pan das IXP Pan Galego e Pan de cea e outros...
Así, este acto mesturará o coñecemento histórico do noso patrimonio vitivinícola e a experiencia sensorial da maridaxe entre os nosos viños e outros produtos de calidade diferenciada cos que conta Galicia.